ஆமோதாலகநாயகி சமேத மாணிக்கவண்ணர் கோயில், திருமருகல்.
திருவாரூர் மயிலாடுதுறை சாலையில் சன்னாநல்லூர் வந்து, அங்கிருந்து நாகப்பட்டினம் செல்லும் சாலையில் 6 கி.மீ மேலாக வந்தால் வருவது திருமருகல். வனப்புடன் திகழும் ஒரு அழகிய தலம். நன்னிலம், மயிலாடுதுறை, நாகை, திருவாரூர் ஆகிய ஊர்களிலிருந்து நிறைய நகரப்பேருந்துகள் உள்ளன.
வடக்கே முடிகொண்டான் ஆறும், தெற்கே புத்தாறும் ஓடுகின்றன.
கோச்செங்கட்சோழன் கட்டிய மாடக்கோயில்களில் ஒன்று.
இந்த நிலையகள் கொண்ட கிழக்கு நோக்கிய அழகிய ராஜகோபுரம் நம்மை வரவேற்கின்றது. எதிரில் அழகிய திருக்குளம் உள்ளது. குளத்தின் பெயர் லட்சுமி தீர்த்தம். கரையில் முத்து விநாயகர் சன்னதி. வாயிலைக் கடந்து உள்ளே சென்றால் பலிபீடம், கொடிமரம், நந்தி உள்ளன. இடப்பால் மேடையுடன் வன்னி மரம் உள்ளது. இங்குதான் செட்டிப்பெண்ணுக்கு சாட்சி சொல்லி அருளிய அதிசயம் நடந்தது.
படிகளை ஏறி முன்மண்டபத்தை அடைந்தால் வலப்பால் அம்பாள் சன்னதி உள்ளது. இடப்பக்கத்தில் தலப்பதிக கல்வெட்டு உள்ளது. அம்பாள் சன்னதியில் குசகேது மன்னன் வரலாறும், ஞானசம்பந்தர் விடந்தீர்த்த வரலாறும் வண்ணத்தில் எழுதப்பட்டுள்ளன.
தரிசித்து விட்டு இன்னும் சற்று மேலே படிகளை ஏறிச் சென்றால் சோமாஸ்கந்தர் சன்னதி. அருகில் ரத்நகிரீஸ்வரர் சன்னதி உள்ளது. ஒரு புறம் விநாயகரும், மறுபுறம் செட்டிப்பெண்ணும், பையனும் உள்ளனர்.
மூலவர் சுயம்பு லிங்கம். சதுர ஆவுடையார். பாணத்தின் அடிப்பகுதியில் ஒரு வெட்டு காணப்படுகிறது. மனமாற தரிசித்து விட்டு உட்பிரகாரத்தை வலம் வருகிறோம். அறுபத்து மூவர், பராசரலிங்கம் முதலியோர் உள்ளனர். தலமரம் மருகல் வாழை வளர்கிறது.
உட்சுற்றினையும், அம்மையப்பனையும் தரிசித்து விட்டு, மறுபடியும் படிகளை இறங்கி வந்தால் வெளிப்பிரகாரம். இச்சுற்றில் சப்த மாதாக்கள், விநாயகர், சௌந்தர நாயகி மற்றும் மருகலுடையார் சன்னதிகள் உள்ளன. கோஷ்ட மூர்த்தங்கள் அவற்றுக்குரிய இடங்களில் அழகுற உள்ளனர்.
தலவிருட்சமாக மருகல் (ஒருவகை கல் வாழை) இருந்த காரணத்தால் இத்தலம் திருமருகல் எனப் பெயர் பெற்றது.
குசகேது மகாராஜா என்பவர் இங்கு வந்தபோது இப்பகுதி அடர்ந்த வாழைக்காடாக இருந்ததாகவும், காட்டை வெட்டும் போது ரத்தம் பாய்ந்ததாகவும், அரசன் சுற்றுமுற்றும் பார்த்து இறையுருவைக் கண்டறிந்து ஆலயம் எழுப்பியதாகவும் திருத்தல வரலாறு கூறுகிறது.
அவரது ஆட்சி காலத்தில் ஒரு கடுமையான பஞ்சம் நாடு முழுவதும் பரவியது. மக்கள் பஞ்சத்தால் மிகவும் அவதியுற்றனர். அரசன் இதற்கு தீர்வு காண முடியாத நிலையில், கோயிலுக்கு சென்று சிவபெருமானிடம் பிரார்த்தித்தார். பதிலாக, ஒரு தெய்வீக குரல் (அசரீரி) கேட்டது, அரசனின் குழந்தையை பலியாய் அளித்தால் மழை பெய்யும் என்று. துக்கத்தில் இருப்பினும், தனது மக்களின் நலனை முன்னிலைப்படுத்தி, அரசன் அந்த பலியைக் கொடுக்க முடிவெடுத்தார். அரசனின் பக்தி மற்றும் தன்னலமற்ற பண்புகளால், மகிழ்ந்த சிவபெருமான் மாணிக்கங்களையே மழையாக பெய்யச் செய்தார். பின்னர் மழை பெய்து நிலம் பசி தீர்ந்தது. அதனால் சிவபெருமானுக்கு ரத்னகிரீஸ்வரர் அல்லது மாணிக்கவண்ணர் என்ற பெயர் ஏற்பட்டது.
செட்டிமகன் விடந்தீர்த்த வரலாறு:
செட்டியார் குலத்தைச் சேர்ந்த ஒரு கன்னிப்பெண்ணும், அவளின் மாமனும் திருமணம் செய்வதென்று முடிவு செய்தனர். யாருக்கும் தெரியாமல் திருமருகல் வந்தனர். திருமணம் முடியாமல் இரவு வந்து விட்டதால் ஒருவரை ஒருவர் தீண்டாமல் சற்று தள்ளியே படுத்திருந்தனர். அப்போது ஒரு பாம்பு செட்டிப்பிள்ளையைக் கடிக்க, விஷம் ஏறி அவன் இறந்துவிட்டான்.
செட்டிப் பெண் கதறி அழுதாள். அந்த நிலையில் கூட தெய்வ நம்பிக்கையை விட்டுவிடாமல், சடையாய், விடையாய், மருகலுடையாய், அரவும் பிறையும் அணிந்த அரசே, ஆலகால விஷத்தின் ஆற்றல் ஒடுங்க நீலக்கண்டத்தைக் கொண்ட நீ காக்க வேண்டும் என்று இரவு முழுவதும் அழுதும் புலம்பியும் இருந்தாள்.
அந்த நேரத்தில் மாணிக்கவண்ணரின் வழிபாட்டிற்காக திருமருகலுக்கு வந்து கொண்டிருந்த ஞானசம்பந்தர் அவ்வழியே வந்தார். செட்டிப் பெண்ணின் அழுகை அவருடைய காதுகளில் விழுந்தது. அந்த அவலநிலையில் கூட இறைவனை இகழாமல், புகழ்ந்து பாடும் அவளது பக்தியும் பண்பும் அவரைப் பெரிதும் ஈர்த்தன. அவள் அருகில் சென்று, “நீயார் அம்மா? உன் துயரமே என்ன?” என்று கேட்டார்.
அவள் தமக்கு ஊர் வைப்பூர் என்றும், தந்தையின் பெயர் தாமன் என்றும், அவர் பெற்ற ஏழு பெண்ணில் தாம் கடைசி பெண் என்றும் கூறினாள். பெற்றோர்களுக்கு தன் மாமனை பிடிக்காததால் வீட்டை விட்டு வெளியேறி அவருடன் வந்து விட்டதை கூறினாள். திருமணம் முடிவதற்கு முன் பாம்பு மாமனைக் கடித்து விஷம் ஏறியதால் அவர் இறந்துவிட்டதாகவும் கூறினாள்.
அதை கேட்ட ஞானசம்பந்தரின் உள்ளம் கரைந்தது. இறைவனை நோக்கி “சடையாய் எனுமால்” என்ற அடியொடு கொண்ட “விடந்தீர்த்த பதிகம்” பாடினார்.
உறியவனின் உடலில் விழுந்து உருள வேண்டியவள், இறைவனை மட்டும் புகழ்ந்து வாழ்த்துகிறாள். இவ்வளவு உயர்ந்த பெண்ணை நீர் சோதனையில் ஆழ்த்துவீர்களா? என்று பாடி வேண்டினார். அவரது பாட்டு அண்டை முழுக்க ஒலித்தது.
உள்ளம் கரைந்து அடியவர் எழுப்பிய குரலைக் கேட்ட இறைவனின் திருவுளமும் கரைந்தது.திருவருள் பெருகி, தூக்கத்திலிருந்து எழுபவன் போல் செட்டிப் பெண்ணின் காதலன் பாம்பு விஷத்திலிருந்து மீண்டு உயிரைப் பெற்றான்.
இருவரும் மிகவும் மகிழ்ந்து ஞானசம்பந்தரின் திருவடிகளை வணங்கினார்கள். ஞானசம்பந்தர் வன்னி மரத்தை சாட்சியாக வைத்து, அந்த செட்டிப்பெண்ணுக்கும் செட்டிவணிகனுக்கும் திருமணம் செய்து வைத்தார்.
இன்று செட்டிப் பெண்ணின் திருமணம் திருக்கோவிலில் சிறப்பாக கொண்டாடப்படுகிறது.
இதை ஒட்டி திருக்கோவிலின் சன்னதியில் விடந்தீர்த்த விநாயகர் மகிமையுடன் பக்தர்களின் வழிபாட்டுக்கு நம்பிக்கையாக விளங்குகிறார்.
- ஞானசம்பந்தர்:
சடையாய் எனுமால் சரண் நீ எனுமால்,
விடையாய் எனுமால் வெறுவா விழுமால்,
மதையார் குவளை மலரும் மருகல்
உடையாய் தகுமே இவள் உள்ளமேவே. - அப்பர்:
பெரு கலாந்தவம் பேதமாய் தீரலாம்,
திருகலாய்கிய சிந்தை திருத்தலாம்,
பருகலாம் பரமாயதோர் ஆனந்தம்,
மருகலான் அடி வாழ்த்தி வணங்கவே
திருக்கோயிலின் தலவிருட்சம் மற்றும் இதர அம்சங்கள் , சிறப்புகள் மற்றும் நிகழ்ச்சிகள்:
- நாடோறும் ஐந்து கால பூஜைகள் மிகச் சிறப்பாக நடைபெறுகின்றன.
- சித்திரை திருவிழா மிகவும் முக்கியமானதாகவும், இவ்விழாவில் ஆறாம் நாள் விடந்தீர்த்த இத்திருவிழா, ஏழாம் நாள் செட்டிவணிகன்-செட்டிப்பெண் திருமணம் என்று நிகழ்ச்சிகள் நடைபெறுகின்றன.
- விடந்தீர்த்த விநாயகர் கோயில் அம்மனின் சன்னிதியின் எதிரிலுள்ள தெற்கு வீதிக்கோடியில் உள்ளது. விநாயகரின் அருளால் அந்த பகுதியில் பாம்பு கடி என்பது கிடையாது என்ற நம்பிக்கையும் மக்கள் மத்தியில் நிலவுகிறது.
- விநாயகர் கோயிலின் அருகிலேயே செட்டிப்பெண் மற்றும் செட்டிவணிகன் தங்கியிருந்த மடமும் உண்டு, அதுவே தம் வரலாற்றைச் சொல்லும் இடமாக விளங்குகிறது.
- திருவிழாக்களில் விநாயகருக்கு இருபுறமும் காணப்படும் சிறுவினாயகர் சிலைகள் சிறுத்தொண்டர் மகன் சீராளனின் வழிபாட்டு விநாயகர்கள் என்ற பெருமை பெற்றவை.
- லக்ஷ்மி தீர்த்தம் என அழைக்கப்படும் குளத்தில் வரலக்ஷ்மி விரதம் அன்று நீராடி, மானிக்கவண்ணரைத் தொழுவதை மூலம் கடன்கள் தீரும் என்ற நம்பிக்கை உண்டு.
- கோயிலின் தலவிருட்சம் வாழை மரமாக விளங்குகிறது, இது தன்னிச்சையாக வளர்கின்றது. கோயிலுக்கு வெளியில் வளர்ந்து வரக்கூடிய வாழை மரங்கள், அவற்றின் பழங்களும் தேனும், மிகுந்த சுவையுடையவை. இம்மரங்களை வெளியில் எடுத்துச் சென்று நட்டால் வளர்வதில்லை.
முகவரி:
மாணிக்கவண்ணர் திருக்கோயில்
திருமருகல்,
நன்னிலம் வட்டம்,
நாகை மாவட்டம் – 609 702.
